Wheatfield X 羅宋湯專門店 (MOKO新世紀廣場) (已結業)

天氣轉涼，日日唔係火鍋就係打邊爐，已經生咗兩粒飛滋，今晚捉咗先生嚟位於MOKO嘅呢間羅宋湯專門店，希望食得健康啲。餐廳除咗主打嘅羅宋湯之外，仲有清雞湯同紅菜頭湯，配搭唔同嘅食材組成套餐，感覺健康又有益。除咗主食之外仲有幾款優惠小食，價錢亦唔貴。酷愛湯烏冬嘅我一諗就覺得羅宋湯同手打烏冬應該幾夾，果然不出我所料，香濃惹味嘅羅宋湯配上彈牙嘅烏冬，完全係一拍即合，而且份量頗多。牛腩半肥瘦，口感香軟腍滑，同羅宋湯相輔相成。汁燒豬髀肉一份兩片大大片，入口略為乾身，口感偏瘦，但肉味頗濃，醬汁亦出色。先生嘅撈麵套餐份量亦好足，自家製麻辣醬撈出前一丁極度邪惡，辣度頗強，越食越過癮。羅宋湯另上，感覺比起我嘅烏冬湯底更濃郁惹味，配料亦非常足。香煎雞扒外皮香脆，但肉質唔會好乾，而且大大件非常抵食。本來擔心食唔飽所以叫埋豬仔包，估唔到超有驚喜！外表烤得好香脆，配上份量大方嘅煉奶同牛油，無懈可擊！餐廳食物質素唔錯，特別係主打嘅羅宋湯，湯底濃郁配料又足，連一向奄尖嘅先生都非常滿意，又一次證明健康餐都可以好好味嘅！