炳記牛牛 (已結業)

距離上堂仲有啲時間，想慢慢坐食個飯又想平，非茶記莫屬。記得附近有炳記牛牛，學生時代間唔中都會幫襯下，咁就坐低慢慢揀下食咩。下午茶同晚餐之間嘅尷尬時間，無乜人，仲好啦可以慢慢坐～揀呀揀，都係揀焗飯，印象中巴黎汁(而家叫巴汁)好似都唔差嘅，清清地配個比目魚。等呀等，等到焗完，好味與否唔講住。熱氣向上升，然後聞到香草味，再望下，芝士係比較少，比目魚都唔大塊，係汁多～好熱好熱，飯入面有好多西芹粟米洋蔥紅蘿蔔，其實會覺得怪，不過夾住飯同汁一齊食，叫做多啲爽脆口感多啲蔬菜味道。飯粒有啲過淋，有啲就焗到脆得滯，以為食到殼，反而魚肉算滑，唔太覺有腥味。整體味道其實又唔係太差～巴汁有香草香味帶少少酸都幾開胃，食極都有，令個飯唔會乾身。有啲味道，有時就係要重溫下～