金翡翠快餐 (已結業)

今日百般不願地同同事出黎旺角送樣辦俾客又同佢地present一大堆，由朝講到晏，飯都無得食。好彩老細都識做，俾我地早放。放是就一齊係附近食埋野先散水，但見過晒LUNCH時間就食個下午茶算了。旺角黎講都算抵食，雖然呢間賣點係雞蛋仔但我地都覺唔係太想食，所以普通啲點返一兩樣就夠了。奶茶雖然未溝勻就上枱，但見佢有啲雲石圖案當下都覺幾靚的。茶香奶滑，是一杯好飲的凍奶茶。炸雞脾配薯條。薯條係波浪形嗰種茶餐廳常見的，炸得脆口可以接受。雞脾雖然唔算好大隻，但完全辟走晒雪藏味，同埋五香粉同鹽味都腌到入去，雞皮仲脆卜卜。同事點左西多士配炸豬扒。豬扒都炸得幾好面包糠好足，包蓋得完全所以食落好酥脆。豬扒用左咖喱醬去腌但唔辣反而幾香。可惜係西多士油膩左啲，同埋得半塊。雖然下午茶黎講呢餐都幾高熱量，但計返午餐同價錢都算差不多了。