Cabana Breeze (已結業)

去東涌睇新居屋，睇完搵地方食飯，喺開飯搵到隔離喜來登酒店附帶嘅呢間餐廳，穿過酒店大堂有道門行出黎就見到有幾間食肆，呢間餐廳門口有啲藤座位，感覺悠閒，微微雨嘅關係安排坐室內，皮梳化加紅色咕𠱸，加上枱面有花配搭，伴隨好聽嘅音樂，柔和嘅燈光，有種渡假嘅感覺。今日趕時間，主要嚟食嘢，叫咗一個意粉，一個披薩。原本菜單係墨汁扁麵條，嚟咗墨汁意大利粉。黑色嘅意粉，紅色嘅蕃茄粒，綠色嘅芫茜苗，配埋白色嘅蟹肉同洋蔥，擺盤都幾靚，飄散住蒜油嘅香味。意粉軟硬適中，叫咗少辣，有好多蟹肉，惹味又好味。披薩叫咗四款芝士，見到有藍芝士另外加咗帕爾馬火腿。披薩焗出嚟熱辣辣充滿芝士香味，卜卜脆餅底加上火腿嘅鹹香，好滿足啊見佢食物種類選擇算多，第日可以放工嚟Happy Hour飲杯嘢都唔錯。