女人街食飯公司

營業中

休息中

帶位嗰陣已經講咗要幾點交位，落單嗰陣又提，每次加單都提，感覺好似催我哋走咁。離交枱時間仲有20分鐘，有個夥計行埋嚟就問我哋要唔要打包，問到老人家唔耐煩，佢就好惡咁樣講咗一句問你使唔使打包啊？搞到好冇癮。講返最重要嘅食物，一入到去叫咗黃金鮮魷同咕嚕肉。黃金鮮魷唔好食，出面個炸皮同入邊嗰舊鮮魷一啲都唔夾，食咗一舊就唔係好想再食。咕嚕肉好普通。之後叫咗胡椒豬肚湯，味道亦都係好普通，杏汁味太重，又見到評語話啲菜唔係好熱，食落就覺得個湯都好夠熱，冷氣吹住嘅時候飲都幾舒服。之後叫咗幾個小食，包括咖喱水魷，麻辣牛柏葉，雞絲粉皮同埋椒鹽雞翼尖。味道都係好普通，雞絲粉皮嘅粉皮太厚，上面嘅雞絲都唔太好食。椒鹽雞翼尖冇乜椒鹽味，食得唔過癮。見啲評語話服務態度好差，公道講句，大部份夥計都好好人，好肯幫手，叫加單同加嘢飲都好快手，係最尾被嗰位夥計催到唔係好耐煩。建議訂位嗰陣提埋客人有時間限制，咁大家有晒心理準備唔使咁勞氣。總括嚟講，嘢食味道普通，員工態度有改善空間，試過一次未必會再試。