Rasoi 傳統印度菜 (已結業)

今晚我同老公一齊去大角咀搵嘢食，行過見到一間餐廳都幾印度風情，決定入去試吓食。入到去餐廳嘅佈置真係好特別，餐桌壁畫全部嘅佈置都好傳統。仲有好令我哋兩個有深刻印象嘅就係有個大電視，一路播住傳統嘅印度音樂，成餐飯就好似係印度食咁。餐廳老闆和侍應都係印度人，所以你要同佢講英文落單。花多眼亂，我哋兩個決定嗌個蒜蓉烤餅同埋芝士烤餅同埋兩個咖喱菜式加海鮮湯。無論你點咩嘢食，餐廳都會先俾你一個免費前菜，係一個好精緻嘅脆薄餅再加三隻傳統嘅醬料，有清新嘅薄荷味、辣味同埋燒烤味。脆薄餅加少少呢啲醬料嚟食就有唔同嘅口味。好好味。。由於我同老公都好鍾意飲湯，我哋決定一試印度嘅湯，我哋揀咗個海鮮湯。好彩個湯冇令我地失望，湯入邊好足料有好多海鮮，包括墨魚蝦等等嘅材料。跟住再嚟咖喱雞同埋咖喱魚。先講講個咖喱雞，雞肉非常嫩口同入味，咖喱好香有少少微辣，配合個雞肉食入口，非常有口感。再講講個咖喱魚我覺得個咖哩汁有啲偏辣，但係鍾意食辣嘅老公就覺得超級惹味。好得意，咖喱雞同埋咖喱魚兩隻咖喱係唔同口味嘅咖喱，香味同辣嘅程度都唔同，絕對值得一試！另外個芝士烤餅味道帶點清淡，所以用黎點汁食就啱啱好，配合咖哩汁後的味道非常之突出。