大師傅粥品 (已結業)

近排食到滯滯哋，所以今日想清吓腸胃，食碗港式靚粥，於是走去大師傅粥品，而猴子近排又食豬膶食上癮，於是就叫咗碗豬膶艇仔粥。碗粥一到，當然是豬膶食先，因為驚浸得太耐會變「鞋」，一試之下，夠爽夠滑，算係滿足到我呢個「豬膶控」，只係略嫌份量唔多，有啲唔夠喉。其餘嘅魷魚同牛肉丸都係一貫嘅港式傳統風味，食落真係好有feel，童年回憶返晒嚟。店內嘅裝修完全係一切從簡，無謂嘅擺設一件都冇，檯檯凳凳都係最實用嗰隻，毫不花巧，不過正正係呢種簡樸風味令人有種緬懷過去嘅感覺。