仁利餅家

營業中

休息中

臨近中秋，又到咗食月餅嘅時候啦🤩 冬甩妹由細到大都好鍾意食月餅，今年屋企人買咗一盒好傳統嘅月餅返嚟，淨係睇個鐵盒都知係好舊式嘅餅店，一開始對佢冇咩好感，抱著「唔好浪費」嘅心態試食，點知一食落先知係寶！😍.👉 紅豆沙雙黃月餅推介指數: ⭐⭐⭐⭐⭐紅豆蓉代替咗平時嘅白蓮蓉，出奇地好味！比起白蓮蓉冇咁甜和膩 (冬甩妹本身已經好食得甜)，而且紅豆蓉非常幼滑，完全冇紅豆衣或者顆粒，個蛋黃充滿油香，入口鬆化，絕對唔係又乾又硬嘅蛋黃，皮薄餡靚，甜度剛好👍 食完8份1舊之後，會好想再食多舊，食下食下就食咗大半個🤣 唯一美中不足嘅係，有時會出現兩粒蛋黃放置位置唔平均嘅問題，導致有時出現其中4份1係完全無黃😅 儘管如此，齋食紅豆餡都好正！.👉 總結：因為冇落防腐劑，所以店家叮囑室溫只可存放三日，之後就要放入雪櫃，食嗰時預先用微波爐叮返熱就得。不過由於冬甩妹屋企冇微波爐，開頭擔心要用焗爐烘返熱會好麻煩，點知一盒四個月餅，極速3日內已經清哂！之後仲叫屋企人再買多咗一盒返嚟，實在太好味😆 不過由於係全人手製作，所以產量有限，有機會去到都買唔到，大家去之前最好打電話去問問先。.⏰星期一至日 07:00-19:00