太爺雞 (已結業)

相傳太爺雞以煙燻炮製豉油雞，先以豉油浸熟雞隻，再用茶葉同糖煙燻，雞肉非常入味，又皮香肉嫩。 白切雞豉油雞就食得多，打正旗號嘅太爺雞從未試過，偶然得知太爺雞喺觀塘開咗分店，工廈樓上舖免茶免加一，菜式價錢又好實惠，小試牛刀睇吓將來可唔可以帶父母開飯。食店似一般地舖傳統飯店格局，有燒味部掛上幾隻太爺雞。白板上寫上海鮮菜式，牆上亦掛上招牌菜式，餐牌圖文並茂，點菜容易。侍應推介小食太爺豬手，豬手切得細細舊，肥膏不多，凍食充滿膠質，肉質爽口，帶有微微麻辣味。太爺雞一如想像中的味道，雞肉非常入味，皮香肉滑，伴上白飯同食最佳。 另侍應推介20頭鮑魚海參扣鵝掌，定價128尚算合理。鮑魚彃牙軟硬適中，炆得入味又鮮美，下次可以帶父母品嘗。海參炆得比較諗身，如果爽口一點口感會更佳。鵝掌帶有微微膠質，口感爽口彈牙，如果再炆耐一點就更佳。梅菜扣肉比一般略瘦，肉質依然保持軟嫩滑溜，肥而不膩，帶有膠質。梅菜吸收五花腩的油分，香濃可口。蒜蓉炒豆苗猛火熱油兜炒以保持豆苗翠綠，濕潤嫩滑而充滿蒜香味。食店以傳統方式炮製食材，份量亦頗大，適合喜歡傳統中菜的食客。