影片
更多
2011-10-07
74 瀏覽
今日有高人指路，帶咗我哋去中環萬花紅食午飯。萬花紅位於中環卑利街，如果唔熟悉中環，都幾難搵；其實沿著荷李活道向東行，過咗伊利近街，見到嗰間舊式涼茶舖---公利真料竹蔗水，轉右嗰條上斜嘅掘頭巷，就係卑利街，萬花紅就係你嘅左手邊，如果你沿荷李活道繼續行，見到GOD嘅話，就表示你已經行過咗啦。行到門口，只見一間落地玻璃嘅舖仔，玻璃上面貼滿唔同食物嘅宣傳海報，上面有一個橙色嘅燈箱招牌，門口則放咗兩張細圓枱；步入去舖面，樓面呈L形，擺滿都只係八張圓枱，一間街坊小炒嘅格局；而係廚房門口嘅角落，就有一座熱水爐，隔離擺咗兩行茶壺，下面則放咗幾”箱”茶葉，原來萬花紅除咗小炒外，仲有茶市點心供應。呢間舖仔，左睇右睇，都唔似有三十幾年歷史，冇蓮香樓嘅金漆招牌和點心車，亦冇陸羽茶室古色古香嘅裝修格局，頂多都係得十年、八年光景，返屋企上網搵吓資料，才知道萬花紅早於1977年已經係中環開業，先係擺花街開舖，及後因拆樓重建關係，就搬到荷李活道，後又因加租關係，再搬到現址卑利街；原來係七、八十年代，萬花紅跟蓮香樓和陸羽齊名，係中環，冇人不識；如今，三間茶樓都依然屹立不倒，但就各走各路線。今日係假期，下午1:30，都唔
萬花紅位於中環卑利街，如果唔熟悉中環，都幾難搵；其實沿著荷李活道向東行，過咗伊利近街，見到嗰間舊式涼茶舖---公利真料竹蔗水，轉右嗰條上斜嘅掘頭巷，就係卑利街，萬花紅就係你嘅左手邊，如果你沿荷李活道繼續行，見到GOD嘅話，就表示你已經行過咗啦。
行到門口，只見一間落地玻璃嘅舖仔，玻璃上面貼滿唔同食物嘅宣傳海報，上面有一個橙色嘅燈箱招牌，門口則放咗兩張細圓枱；步入去舖面，樓面呈L形，擺滿都只係八張圓枱，一間街坊小炒嘅格局；而係廚房門口嘅角落，就有一座熱水爐，隔離擺咗兩行茶壺，下面則放咗幾”箱”茶葉，原來萬花紅除咗小炒外，仲有茶市點心供應。
呢間舖仔，左睇右睇，都唔似有三十幾年歷史，冇蓮香樓嘅金漆招牌和點心車，亦冇陸羽茶室古色古香嘅裝修格局，頂多都係得十年、八年光景，返屋企上網搵吓資料，才知道萬花紅早於1977年已經係中環開業，先係擺花街開舖，及後因拆樓重建關係，就搬到荷李活道，後又因加租關係，再搬到現址卑利街；原來係七、八十年代，萬花紅跟蓮香樓和陸羽齊名，係中環，冇人不識；如今，三間茶樓都依然屹立不倒，但就各走各路線。今日係假期，下午1:30，都唔係好多人，我們就佔用咗一張中枱；環顧四週牆上嘅宣傳海報，除咗一般小菜外，最吸引嘅，係羊腩煲和蛇羹；但食午飯時間，未有胃口食羊腩煲，只係叫咗個例牌蛇羹$298，再點了欖菜肉崧四季豆$55、蝦醬通菜牛肉$58及炸子雞半隻$118，可惜伙計說炸子雞未準備好，我哋就只好轉叫香煎蓮藕餅$55，再加幾籠點心。
伙計落單後，將食物記錄咭放返我哋枱上，驟眼一看，係記錄咭嘅背後，寫有幾行字，應該係我們點了的菜式，隨手拿來一看，字體秀麗，輕重有序，係現今科技發達嘅社會裡，要寫得一手好字已經唔多，仲要係出自一位茶樓伙計嘅手筆，就更加難得，值得欣賞。
再望吓對筷子，雖然唔係什麼象牙筷子，但係從筷子嘅顏色，已可知萬花樓嘅歷史不淺，而且係筷子上面，仲用紅字刻有”萬花紅酒家”字樣，如今，已經好少見。
茶，香片，茶色清澈，略帶淡淡嘅甘綠色，可惜香味欠奉，入喉亦冇餘香，非靚茶葉。呷咗啖茶，伙計就揣上一個石油氣爐及一碗卜卜脆、菊花和檸檬葉，我隨手就拿起一小塊卜卜脆食，果然脆，絕對唔會擺到腍哂，亦唔油膩，幾好食；不一會，嗰蛇羹就出場啦，一個不銹鋼鍋上，唔係一般嘅砂鍋，唔知有冇特別嘅原因，可能比較傳熱啩；嗰不銹鋼鍋睇落唔係好深，但係我哋四個人，每人都分到兩碗，平均每碗都只需$37.25，非常抵食。
先講賣相，唔太吸引，湯底呈瘀啡色，唔夠光澤，材料有蛇絲、肉絲、木耳等等，唔記得有冇冬菇絲，但刀功略嫌粗疏，有部份食材切得未夠”絲”；至於味道，鮮甜，味濃，唔錯，而且稀杰程度適中，加入菊花和檸檬葉，更能帶出蛇羹嘅香甜，食完頭輪，我哋仲要求伙計為我哋添加檸檬葉，準備第二碗。
點心未來，先上兩碟菜，蝦醬通菜牛肉，未食，已經聞到一陣濃郁嘅蝦醬味，非常香，很吸引，夾了一口通菜，夠火喉，唔老，爽口，有蝦醬味，但唔會太鹹，唔錯，再夾一口牛肉，味道亦唔錯，但肉質略韌，普普通通。
至於欖菜肉崧四季豆，賣相麻麻，好多黑色點點，好似焦焦哋，夾了一口，但係毫無焦味，反而幾香口，唔係乾炒，所以有少許油，但油份量唔過份，唔油膩，肉崧份量亦唔少，對於喜歡食肉嘅我，絕對合適。
跟著，係香煎蓮藕餅，一揣上枱，覺得有一股熱氣湧出來，絕對係剛剛煎起上碟，但賣相麻麻哋，一塊一塊大小相近，但形狀三尖八角，再者，蓮藕餅煎得乾身，但好似煎得有點過火，表面好似焦焦哋，嚐了一口，完全改觀了，體驗到”人不可以貌相”嘅道理，雖然表面焦焦哋，但咬落去，一丁點焦味都沒有，反而係外脆內爽，蓮藕餅嘅表面係乾得有道理，脆脆的，入面則味道豐溢，絕對保存到蓮藕嘅香味，亦有爽口嘅咬感，比蓮香樓更出色。
再來係幾籠點心，萬花紅嘅做法，同坊間嘅點心舖一樣，即叫即蒸，並唔係一般大茶樓嘅做法，一批一批咁蒸出來，所以比較需時。
蝦餃都幾大隻，皮都算簿，蝦肉爽口，新鮮，唔錯；燒賣都算大粒，但豬肉份量比蝦多，有肉味，但唔夠爽口，相比之下，我喜歡蝦餃多d。
最後仲有馬拉糕和奶皇馬拉卷，馬拉糕絕對又係一傳統美食，熱騰騰，香味撲鼻，顏色偏深色，未食，都知道係用黑糖做，一啖咬落去，非常鬆軟，但味道偏甜，可能係黑糖嘅關係，味道比較濃、比較甜；至於奶皇馬拉卷，味道比馬拉糕淡，質地不及馬拉糕鬆化，而且奶皇味不足，比較差。
埋單$560，平均每人$140，其實最貴都係嗰蛇羹，若果剔除嗰蛇羹，每人唔駛$100。食過萬花紅幾個小菜和點心，覺得萬花紅嘅火喉了得，有鑊氣，味道亦係傳統嘅做法，比較重手，比較濃味，絕對係一間值得保存下去嘅傳統茶樓，唯菜色嘅賣相和茶葉嘅質素，應該可以提升一吓；但以咁嘅價錢，可以食到呢d傳統美食，都算抵食。
張貼
