高麗軒韓國料理 (已結業)

高麗軒韓國料理喺尖沙咀已經好一段時間，放工經過嘅時候見到好抵食，決定去食一食。原本嗰餐二百幾蚊可以食到咁多款肉已經好抵，原來加$38仲可以食埋加拿大prime雪花牛同埋A3雪花牛，仲有帆立貝同帶子呢啲，都好抵加。加拿大Prime雪花牛真係好唔錯，肥瘦均勻，油脂分布都幾靚，燒落去陣陣牛油香味，基本上食呢一隻肉已經抵返晒。特級牛頸脊相對地會冇咁肥，而且比較有咬口，鍾意食牛頸脊嘅都唔應該錯過。帶子每一隻都好大隻肥美，有少少蒜頭喺上面，燒落去好快就熟，食落去煙煙韌韌都幾好味。熟食方面，都幾推薦佢呢隻招牌牛肋骨湯，湯汁都幾入味，牛肋骨好大嚿，蘿蔔都好香甜。燒銀鱈魚好大舊，好香脆，點上沙律醬，陣陣魚油香，都幾推薦。