酥妃皇后 (蘇杭街)

營業中

休息中

住喺呢頭附近，一直行過見到個鋪頭裝修緊，比個紙板吸引寫住「蛋撻皇后」，傳聞嘅酥皮係用368層酥皮去整，就一直好期待，日日喺度等睇下佢幾時開，好想知道點樣好食法，講到喺九龍城好出名。前幾日放工見到佢著燈，知道佢終於開咗啦，但係因為放工7:00嘅時候已經冇乜餅淨，佢櫥窗啲牛角包啊，西式餅撻，都好吸引好靚，但係我一心係為咗個蛋撻以黎，想食蛋撻嗰啲就買唔到，得返西式酥餅，所以就敗走而回。死心不息一定要食到佢嘅蛋撻，終於有一日lunchtime嘅時候路過，即刻走去買，仲喺餐牌度意外驚喜見到有《榴槤蛋撻》，簡直令我興奮，即刻好好奇好想食！！買咗一個榴槤蛋撻同兩個原味蛋撻，包裝得好穩陣。原味蛋撻傳聞個酥皮有368層，食落去真係非常鬆脆，果然名不虛傳，蛋心非常嫩滑，仲有陣陣既蛋香，真係好好味！！到我最緊張嘅榴槤蛋撻，蛋漿甜度同榴槤好夾，入邊仲有少少榴槤肉，加埋個鬆脆嘅酥皮，令人好有驚喜！！一定要再encore，下次會買啲俾同事食。