上野鐵板燒專門店 (已結業)

第一次寫食評，想一讚呢間鐵板燒！本來都無太大期望，係我老公話未同我食過鐵板燒所以盲中中就去試！開頭見無咩人食，心諗：會唔會真係難食先無人架？我地坐係吧位，可以欣賞下師傳既手勢，叫左個大蝦二人餐！有埋沙律同雙色刺生，出奇地新鮮呀刺生夠鮮甜大件！正！已經開心定先！再黎個沙律都好好味，開胃！之後見到師傳開始整我地啲蝦喇，佢手勢好好，賞心悅目！佢地好食在個配汁夾得好好，啲蝦夠口感又入味！之後有炒雜菜同雙色瓜！都係味道岩岩好，正！到塊牛扒喇，我地要五成熟，整到岩岩好，有肉汁有燒香味！可能因為我地坐吧既關係，佢仲熄燈點火燒一燒塊牛！嘩嘩。。。。可能燒一燒更加帶出左牛扒本身既肉汁香味，真係好睇又好食！稍為遜色少少既係個牛肉炒烏冬，啲牛肉硬左啲！但應該係材料問題！最估唔到既係師傳將開頭個兩隻大蝦既蝦頭都燒左俾我地食！香脆好味，第一次甘樣食個蝦頭咋！好有驚喜！個餐有埋甜品，我地叫左一個雞蛋布丁，一個芝麻雪糕，好味！睇得出師傳好用心去煮每道菜，我要讚師傳！佢係高高地黑黑實實眼細細既！下次去食都要搵返佢整！