大喜屋 (已結業)

節日到，幾個大食積想唔太貴食餐日式放題，揀咗尖沙嘴地鐵出口傍方便到爆嘅大喜屋，平日經過都見到大約八九點左右就會見一眾食客於彌敦道大排長龍上去大快朵頤。為避開大排長龍所以選食6:30較早時段。坐低填完一輪餐紙，食物好快就上檯。第一輪先食沙律，相信因為第一輪晚飯時段蟹子沙律及蕃茄沙律嘅蔬菜都好新鮮，碗底亦唔見有蔬菜水。炒黃金蝦一定唔係是晚焦點，不過都唔差。開始食入直路， 壽司大小可能較細，不過正正因為放題可以食多幾件又變相食少啲飯。 刺身甜蝦、帶子、三文魚樣樣都十分新鮮甜美。天婦羅上碟亦唔覺油淋淋，欣賞廚師無因為放題就揸流灘。枝豆、中華沙律小食醒胃。魚籽鮮露筍三文魚有特色，味道亦唔差。燒物沖繩黑糖燒牛仔肉超多肉汁。鍾意食燒羊鞍只要食兩塊已經覺得回本。欣賞燒雞翼剁開骨骹方便易食。燒廣島蠔上檯即食唔等得。每次入單見甜品都唔會落單住，最後變成全餐最期待落嘅 order 。 泡芙、馬卡龍都唔差。但提拉米蘇杯 及 朱古力杯真係有食兩杯都唔夠嘅感覺。希望大家都可以開開心心食下食下又過一年。