NEXT Shikaku

營業中

休息中

呢間店一直都好想試，不過之前都做足 research，食評都係普遍話如果呢個價格定位唔係好值。但係，一間咁標誌性嘅店，點都試一試啦。牡蠣🦪清湯拉麵🍜香味 (4/5) - 一聞落去，香味係足。主要係聞到蠔味，煙燻味，同少少鰹魚味。湯頭 (3/5) - 本身係清湯，飲落有蠔味同貝類嘅鮮甜味，鮮度夠，不過鹹度稍為高左D。個拉麵入面有一堆鰹魚粉，本身個粉我有試過，係不帶鹹味嘅，所以我覺得佢過鹹左D，係因為個調料，相信係鹽湯加多左。而且，撈勻左個鰹魚粉之後，個湯就變得混濁了，以下張圖係撈埋堆鰹魚粉之後影嘅。麵條 (3/5) - 以粗度來講，目測係中細麵或中太麵之間，而明顯係平打麵，比較扁身。麵條口感味道都算唔錯嘅。配料 (3.5/5) - 因為係牡蠣拉麵，當然著眼點係個蠔本身。試落，基本上係急凍廣島蠔，係夠鮮嘅，不過冇驚喜。此外，蔥係有心機嘅，我估係用九條蔥，切成條狀，刀功值得一讚。另外有加左食用花，增加香味同味道層次。豬叉燒係最好嘅部份，有用火槍燒過，好香之餘，就算用嘅係五花肉部份，都唔會太油膩。咁多配料當中，只有呢塊（得一塊😅）我係珍而重之咁食。蝦雲吞方面，皮薄餡靚，係幾好食，蝦頗鮮又爽口。