風月堂 (已結業)

本來一心係想去南記既，但係去到無位，而我又只得一個鐘時間食飯，所以友人就提議行上一層食風月堂。入到去睇個午餐menu，最平都要$98加一，過百蚊食個lunch，在我而言實在太奢侈，不過既然都坐低左就試下吧，心諗唔係伏就好了。最後叫左個欖油三文魚硯肉天使麵$98餐湯同沙律二選一，我揀左沙律，雖然價錢偏貴，但係個餐真係好豐富！首先黎左個牛油餐包，可惜唔係暖粒粒，只不過係普通面包無咩特別。沙律就有兩隻蝦同少少芒果肉，食落就唔似新鮮芒果，不過配埋芥末蜜糖，整體都算不錯。輪到主菜天使麵，有點意外既係份量頗多，三文魚一啲都唔腥，仲有好多蘑菇同蜆肉，而且唔算太油又好開胃😋友人叫左個燒春雞徳國腸配薯菜，薯角好香脆，唔會又油又林，雞肉唔粗糙又唔硬，配黑椒汁絕對好食！至於腸仔就同平時食的一樣，不過不失。食完個主菜其實已經好飽，但係個餐仲有個雪糕窩夫。雖然係跟餐既甜品，但絕對唔馬虎！雪糕我揀左豆腐味，豆味好香，食一淡已經愛上了。不得不讚個窩夫，外脆內軟，好香牛油味，配上雪糕簡直一流，飽都想食都幾個😆順帶一提，餐飲叫左杯雜果賓治個人覺得味道麻麻，但友人就覺得好好飲，但口味既野因人而異，不妨試試🙆🏻