韓閣 (已搬遷) 新店位置

見呢幾日天氣涼涼地就好想食韓國菜。經過呢間韓國餐廳，見個價錢都算合理，就決定同朋友一齊試吓。朋友叫咗呢個泡菜五花腩鐵板飯。用鐵板嘅方式上五花腩真係非常特別，上枱嘅時候仲渣渣聲。肉，係用咗真正嘅五花腩肉，而唔係平時普通個d薄切豬肉片。佢唔算話好辣，適合唔係好食得辣嘅朋友。肉加埋個醬汁，用嚟送飯一流不過要提醒一下，飯係要加$5先有。而我就叫咗呢個岩漿炒飯。雞蛋嘅味道十分之出，配合埋芝士一齊食，真係好邪惡。炒飯係泡菜炒飯，但係要讚賞嘅係入邊竟然有幾塊五花腩肉，完全係意料之外。另外，我地仲叫咗一個蛋捲。蛋捲加上明太子嘅鹹香味，食落好夾。總括來講，呢間舖頭嘅價錢相對上比較平，但係都能夠提供到唔錯嘅韓國菜，而且店員嘅態度非常親切。途經荃灣嘅，可以一試囉。