宮葉 パフェ (已結業)

一點幾黎到宮葉，已經要排隊等入去。早知早少少黎。等左一陣，終於有位。呢度既野價錢合理，食完餐仲可以揀甜品，所以我諗應該係咁先好多人黎。叫左個咖哩牛肉丼。好快上菜。日式咖哩普遍係甜d，冇乜辣。但呢度整到甜之餘，辣味調得啱啱好，呢種咖哩味係我鍾意既日式咖哩，唔錯！溫泉蛋同飯撈埋一齊食，好味，幾時都覺得蛋係萬能的。蛋，飯，再加埋咖哩，個香味即刻出曬黎，排隊食係值得既！食完已經飽飽地，因為份量都算多。但因為比佢個甜品吸引左，一定要叫個甜品黎食。野食50蚊以內，甜品都差唔多，野食加甜品都淨係一百蚊，食日本料理，有野食同甜品，其實價錢真係好合理。叫左個宇治抹茶。正呀！賣相已經好吸引，抹茶雪糕，小丸子，水蜜桃，啫喱，紅豆，蜂巢餅等等，好豐富，好多野食，50蚊，之前去過一間日本料理，呢碗野至少80蚊，所以呢度真係一個字，好抵！雪糕唔會太甜，加埋蜂巢餅個味道好夹。小丸子都好彈牙，仲有個栗子，口感鬆軟味道甜，食到好滿足。食完個甜品真係會覺得超飽！好抵食，今日食過最抵既一餐！