Cafe Paradise (砵蘭街) (已結業)

第一次去呢間餐廳食飯，下午一點幾去到就已經全院滿座，等咗一陣就已經有位。呢間餐廳雖然面積少，但啲枱都好多下，所以感覺有啲侷促，而因為佢地最出色嘅係石燒美國牛肩扒，所以都好多人叫，但亦都令到間餐廳充斥着好大嘅油煙味。我一行兩人，叫咗一個All Day Breakfast 同一個石燒美國牛肩扒套餐。首先個All Day Breakfast 就好快已經上枱，食物質素係唔錯，份量亦都夠大，相信兩個女人食一個都已經會夠飽。但另外叫嘅石燒美國牛肩扒就等咗好耐先上到枱，基本上係個All Day Breakfast 食咗3/4先上到黎。第一次玩呢啲石燒嘅牛，確實係幾過癮，可以根據自己想要幾成熟嘅牛而去自己用熱石烹調。但亦都可以食到舊牛其實無咩牛味，口感叫做過得去。去到埋單，兩人食咗約200蚊唔使加一，我自己個人覺得呢個價錢呢種質素都算合理，但如果有追求生活品味或者食物質素，可以選擇其他餐廳。