板上 (中海日升中心) (已結業)

今個星期日喺附近啲工廠大廈玩完VR，上openrice見到網友介紹呢間板上，地方舒適之餘仲要無時限任坐，啱哂同班戰友喺度賽後檢討。餐廳採取自助形式，出去買完飛攞張飛仔坐番埋位等，唔怪之得價錢能夠做到咁貼地。首先嚟嘅係凍巨峰乳酸梳打，甜度平衡，巨峰提子嘅味道同乳酸好夾。水牛城雞翼，最鍾意水牛城雞翼甜甜酸酸之餘仲帶點辣味，呢度嘅水牛城雞翼除咗味道好之外，外皮仲非常香脆，絕對值得一試。安格斯牛肉漢堡配脆薯皇，漢堡相當巨大，目測有成四吋厚，麵包鬆軟，伴隨著嘅係香口嘅芝麻，內餡十分Juicy，安格斯牛肉個牛味果然係香濃啲。蒜香三文魚燒雞配珍珠飯，我哋另外仲加咗一塊可樂薯餅，燒雞嘅照燒汁用嚟送飯一流，三文魚都幾大塊，塊薯餅入口都仲係熱辣辣㗎。餐廳位處觀塘嘅商業區，星期六日嚟個感覺特別休閑，臨走聞到咖啡嘅香味，下次再嚟試吓先。