美味廚 (已結業)

星期五晚，女友突然想睇戲，就佢放工睇10:15場蜘蛛俠@The One。8點幾9點尖沙咀食晚飯，無訂位臨時搵地方食飯都幾煩…… 唔想去茶餐廳同自由行逼，醒起之前食過呢間，水準唔錯價錢合理，一於encore！二人套餐E有雞茸粟米羮（免費改酸辣湯），牛筋拼牛腩，蝦仁玉子豆腐，清炒時菜，菜飯兩位，豆沙窩餅。食物水準算中上，酸辣湯當然要自己加辣椒油，牛筋牛腩同蝦仁豆腐都唔錯，個菜廚師重手咗，好咸！本來唔想搞事，叫個侍應攞碗熱水，諗住過下水就算，點知個侍應亞叔，竟然…… “唔好意思，不如同你炒過一碟”！今時今日呢D服務態度（主動），大酒家大餐廳都好少有，心底本來有嘅少少不快，立即一掃而空，兼夾加分不少！同時亦留意到，三位侍應一有空閒，就主動為客人添茶及收拾枱面上吉碟；有自由行同胞光顧，同樣熱誠禮貌招呼，並非一般的“晚娘”面口！套餐連茶位、加一，不用$300，但食物水準加上優秀的服務態度，令我感到很滿意的一個晚餐！