茶木‧台式休閒餐廳 (已結業)

老細出咗trip，難得可以準時收工，梗係搵朋友聚舊啦，想搵個地方坐耐啲傾下偈，最後選擇咗茶木。食物有多種選擇，加30蚊可以轉餐，有飯，甜品及飲品，都算抵食。鳳梨鮮果甜酸肉 :咕嚕肉一向都係我嘅最愛，貪佢酸酸甜甜送飯一流，豬肉經炸過後配上甜酸汁，食落香脆唔韌，甜酸汁唔會過酸相當開胃，配菜除咗菠蘿外，仲有士多啤梨及火龍果，食完肉後食返幾粒份外清新。古早味三杯雞 :三杯雞用小鍋送上，下面再用小蠟燭滾住，唔駛驚食得耐會凍晒。三杯雞豉油味微甜，雞件份量都幾多，亦到煮得入味，但略嫌比較多骨，食到中間已經有啲累。甜品分別叫咗小茶木劇院及黑森林櫻桃蛋糕，小茶木劇院略嫌過甜，食多兩啖已經覺得好漏，黑森林蛋糕朱古力味香濃，而入面嘅櫻桃粒都幾香甜。總括黎講，呢度坐得都幾舒服，難得今日唔多客人，環境算寧靜，間中同朋友黎食嘢傾偈都唔錯。