古味坊 (已結業)

依家古早味蛋糕盛行，賣古早味蛋糕嘅舖頭愈開愈多，而且每次經過都會被一批批嘅蛋糕同香氣吸引住，今次去元朗千色廣場，發現係廣場對面又開咗間新嘅小店，一口氣買咗3款口味試下。環境小店一間，光線充足，同依家普遍賣古早味蛋糕嘅店面相若。餐牌流心咸蛋芝士蛋糕 $75呢款最吸引我！又有咸蛋，又有芝士，食落都果然係最啱我口味，蛋糕幾重蛋香，中間一層咸蛋同芝士，唔會太鹹，味道剛好，咸蛋芝士令蛋糕口感濕潤咗，食落無咁乾身，不過蛋糕偏實，食落去真係好足麵粉，再加上有芝士，食完一小片都真係好飽！黑糖蛋糕 $60本身怕會好甜，可能係將平時整蛋糕嘅白砂糖改用為黑糖，所以食落唔覺得甜，不過黑糖味較淡。抹茶蛋糕 $60最後一款試抹茶，同樣唔甜，有少少茶香。總括依然，蛋糕厚實，絕對唔係空氣感蛋糕，但依我個人口味而言，可以鬆軟返少少。