Cafe 52 (已結業)

元朗朗屏工業區入面嘅cafe 52，有室內同户外位置，帶狗就可以坐户外嗰幾張枱。間餐廳係兔仔主題，剛好又係萬聖節🎃整左不少節日裝飾，打卡影相確實唔錯！食物有意粉、沙律、三文治、小食等等，價錢都好合格，大約$70就有一份主食。韓汁雜海鮮意粉配三文魚$68韓式蕃茄汁辣辣地好過癮，配上三文魚分量都唔少，我揀左扁意粉軟硬適中，口感不錯。Cafe 52豪華全日早餐連飲品$138呢個all day breakfast 有好多款食物！有司華力腸、黑松露炒蛋、芝士焗大啡菇、薯餅、沙律菜、牛角包、火腿夾芝士卷、三文魚夾芝士，同埋車厘茄夾芝士，好豐富同埋味道都唔錯！跟餐仲要任選餐牌入邊嘅飲品～性價比都幾高。焦糖綠茶鮮奶可以選擇凍飲或者熱飲，我就揀咗凍，唔會太甜，抹茶牛奶好香滑，仲要有埋焦糖味，味道好夾。榛子朱古力咖啡$39咖啡香滑濃郁仲要散發住榛子味，又唔會過甜，配合埋朱古力味道更加有層次。