鐵皇日式鐵板燒 (已結業)

元朗鐵皇鐵板燒餐廳為慶祝開業8週年推出8折優惠，我地一行十人搵日包場去食。餐廳只有十幾個座位，客人可以近距離欣賞師傅嘅功架。Menu有套餐或單點，我地人人口味唔同所以決定單點。泰國巨虎蝦真係超巨型！！隻隻長過手臂架！師傅技巧非常純熟，三兩下功夫就將大蝦去殼切件。蝦肉新鮮肥美，肉質爽彈，加埋自家製香草牛油汁更惹味！鐵板火焰酒煮蜆同平時食到嘅有少少分別，師傅會即場倒清酒再點火，令到蜆肉充滿酒香但唔會有苦澀味。羊肉炒飯係鐵板燒料理中並不常見，炒飯加入孜然粉減輕羊肉羶味，連唔食羊嘅朋友都接受到，仲食晒成碗！鐵板燒安格斯牛丼加左大量蔥蒜同洋蔥超香薄切牛肉嫩滑多汁，肉味濃郁，油脂大爆發！最後唧少少wasabi蛋黃醬，有畫龍點睛之效，感覺清新不膩。最欣賞珍珠米煙韌飽滿，配上牛肉更滋味！香港地做飲食業真係唔簡單，可以係元朗呢個競争咁激烈嘅地區站上8個年頭，要有返咁上下實力至得。