利滿皇宮 (已結業)

好耐冇一盅兩件，今日就嚟到元朗西鐵站附近呢間新開嘅酒樓飲下午茶。地方好大好寬敞，又光猛，裝修陳設應該係上手留低嘅，唔係特別新，不過都乾淨企理。雖然食肆堂食放寬到4個人，不過都冇以往周末去酒樓飲茶咁墟撼要排隊攞飛。睇嚟飲食業都仲要捱一排。點咗嘢食唔使等好耐就陸續上枱。醬皇蒸鳳爪都好腍好入味，中規中矩。川味牛柏葉爽口惹味，辣味啱啱好，唔錯。黑松露炸蝦角，外皮炸到好香脆，不過就比較油，蘸沙律醬食就冇咁膩，裡面嘅蝦肉都爽甜嘅，不過就唔係點食到黑松露味。陳皮牛肉腸，腸粉唔會太厚，但就略嫌唔夠爽滑，牛肉都新鮮有牛味，陳皮味就唔太出。XO醬炒腸粉，腸粉滑但XO醬味唔夠惹味，配埋青紅椒芽菜炒冇咁油膩嘅口感。排骨陳村粉，粉質厚實唔夠滑，略嫌乾身，味道係ok的。黃金糕，口感比較實，唔夠鬆軟Q彈。蒜香水冬芥菜，都幾新鮮，甘甘甜甜，本來諗住食啲菜解下膩，不過都落咗幾多油落去炒，食起上嚟係好食嘅。