永恆豬雜粉

營業中

休息中

今日又係元朗搵食，呢次試咗新嘢，就係食豬雜湯。牛雜大家食得多，專門食豬雜又真係吾係咁多，所以一定要去試。小店位於元朗水車館街，店子小小，只有三張二人枱，繁忙時間需耐心等候坐位。如果住得近，或者外賣食更快捷。見餐廳介紹自己有肉檔，每日供應新鮮豬雜。並且以大量豬骨熬製香濃豬骨湯底，然後採用新鮮豬雜即叫即生滾。《足料豬雜湯》（$88）成碗豬雜湯有曬心、肺、喉、膶、肚、橫脷、粉腸等，令整碗湯好鮮甜。咁大碗，咁多工夫需要處理，真心抵食。最緊要嘅係，我朂鍾意食嘅豬腸同豬肺，都洗得好乾淨冇蘇味。《滷水豬大腸》（$28），滷水夠入味，而且唔會太肥美，感覺冇咁邪惡。試埋個《豬腳筋薑醋》（$58），又幾好飲，蛋夠香，豬手腳夠惹味，仲有腳筋添，好補身。整體真心不錯，值得去試吓。