寶石餐廳 (已改名) 查看

今次喺元朗食嘅呢餐非常滿意，所以要開心share下。呢度環境非常唔錯，好有格調，令人感覺好舒服。可以喺Main Menu揀一款主菜，加$48就可以升級套餐，咁就可以有埋餐包、餐湯、飲品、甜品。餐湯我揀咗羅宋湯，係一個非常濃郁嘅雜菜湯，酸酸地好開胃。餐包好軟熟，好新鮮。主菜方面，我點咗風乾煙腩卡邦尼意粉，意粉煮得啱啱好，al dente，好鍾意佢嘅口感。卡邦尼醬汁比較杰身，好容易掛喺意粉上面，煙肉好香口而且脆脆地，每啖意粉嘅味道同口感都好rich。飲品方面，drink menu 非常吸引，特別係水果茶。但今日我都係想飲熱飲，所以點咗杯熱奶茶，奶茶都幾大杯，幾香滑。下次再嚟要試吓佢嘅水果茶。甜品我揀咗乳酪，乳酪嘅質感比較杰同厚身，配上百香果果醬，味道豐富。