中環茶記 (已結業)

疫情下本身都唔應該出街嘅，但係因為有啲事要黎一黎中環，順手食埋個午餐。見到呢間叫做中環茶記嘅茶餐廳好有特色，裝修好特別好懷舊，入邊亦都好企理，感覺坐得好舒服，於是就入去食個晏晝先。入邊防疫設施做到足，枱與枱之間相距嘅距離非常之充足，枱枱櫈櫈同埋地下亦都賣得非常乾淨，令到食客感覺非常之安心。我同男朋友嗌左兩個餐：一個係雞扒全餐配多士，另一個係叉燒炒蛋飯，另外再加多碟瑞士雞翼。我雞扒全餐非常之足料，雞扒大大塊、條腸煎得好香、炒蛋炒得好香滑、有火腿有薯餅有茄汁豆仲有個非常之邪惡嘅多士，呢個價錢好抵食。另外我男朋友嗰個叉燒炒蛋飯，亦都係非常惹味啲叉燒香甜可口入口即溶，加埋杯港式奶茶就真係Perfect。另外要提一提嘅就係入邊嘅裝修，好懷舊嘅卡位雅座同埋方格階磚，令人好似返咗去七八十年代咁，入邊有好多舊時香港嘅相都幾有氣氛㗎。