Ocio (煙廠街) (已結業)

我朋友係Ocio既會員，所以今次朋友約食飯，順理成章去咗ocio。餐廳位於煙廠街，平時唔係好熱鬧，估唔到七點幾去到餐廳已經座無虛席。餐廳裝潢冇乜特別，唯獨圖中既鐘映入我眼簾，散發一陣古典氣息。我同朋友各自叫咗dinner set，dinner set附送粟米忌廉湯。Ocio既奶茶係西式奶茶，味道偏淡，不過可客人可自行放奶同糖既份量。焗芝士肉醬千層麵賣相普通，但其實內裏乾坤。首先最緊要係質感唔濕，另外芝士用左兩款，可謂雙重滋味，芝士多到連碟邊都有，加埋肉醬真係味道濃郁。龍蝦汁日式鐵板魷魚意大利飯賣相別具創意。師傅用紫菜包住意大利飯，上面放上一大片魷魚，外型同壽司一模一樣。魷魚幾惹味爽口，意大利飯口感唔會太過稔。Set dinner 加多$39就有芝士薯條。薯條唔算油膩，而且炸得香脆，如果芝士醬再多啲就完美。食完dinner set始終意猶未盡，所以叫埋甜品。朱古力榛子窩夫幾厚。雖然唔係太脆，但窩夫入面全都係朱古力餡，朱古力味特別濃郁。朋友果然冇介紹錯，即使唔係聚會，我都可以帶女朋友嚟食甜品。