沙嗲王 (金馬倫道) (已結業)

沙嗲王，我相信唔需要去刻意介紹佢嘅來龍去脈，大家都應該喺學生年代有去過。小弟我同好多人一樣，讀緊書嗰陣成日會去食，不過畢咗業之後就冇再去過。當日同同事傾開中學回憶，又咁啱行過沙嗲王，同事問我「不如去食沙嗲王啦」，我ok咗然後我哋就入咗去食。基本上讀書嗰時淨係會叫白咖喱豬扒飯，不過難得嚟到，我想試吓其他嘢，但係又好想食佢個白咖喱豬扒，於是就嗌咗個白咖喱豬扒配烏冬。白咖喱都係咁，味道同我讀書嗰時冇乜分別，每一啖都充滿學生回憶。總括而言，都算係中規中矩嘅一餐，係食回憶多過食質素。