鳥華亭

營業中

休息中

光棍節冇拖拍，收咗工就約表弟去啤一啤佢，全因午飯時間發現公司後街間拉麵店「鳥華亭」推廣緊歡樂時光沖繩生啤買一送一之優惠！小店隱蔽於灣仔交加里，門面掛著鮮紅色嘅燈籠，入黑後尤其搶眼。門外貼出餐飲項目詳情，方便貴客參閱。餐店左方為廚房及吧位。右方則排有三張四人散座，全店都擺放出大大塊抗疫膠板。木造餐桌椅櫈尚算簡潔企理。桌上之餐具、調味及開水全為自助式。中英對照嘅點菜紙只有一頁，不過當中並無列出歡樂沖繩生啤，推介酒品必須直接同外籍服務生落單。清爽嘅沖繩生啤即叫即斟，啤酒杯全部從冰箱取出，包保夠哂凍！請留意，沖繩生啤共分大杯裝及中杯裝兩款，原價分別為$68杯及$48/杯，傍晚六點至九點買一送一，推廣優惠原本於10月31日已完結，但據悉老闆臨時決定加料，幾時玩完就未定。嘻嘻，兩老表既然有意尋歡就梗係淨飲大杯啦！意外地，叫黎送酒嘅炸蓮藕片（$29）巧薄香脆，而且毫不油膩，點上伴配嘅沙律醬更覺醒神美味，邊飲邊食，好快就要追加第二碟，明顯堅好味！灣仔橫街拉麵店「鳥華亭」面積雖小，但勝在服務生效率高，歡樂時光可享沖繩生啤買一送一優惠，加上有可口嘅炸蓮藕片送酒，絕對抵試。