真秘鍋 (已結業)

呢排天氣開始轉涼，最開心就係同一班好朋友打邊爐！係OpenRice見到呢間火鍋店，除咗嘢食夠吸引之外，仲可以同朋友喺獨立嘅VIP房唱K，大房有埋獨立洗手間。我愛上左佢嘅湯底招牌龍蝦湯，真係好鮮甜同埋好濃郁啊，湯入面仲有成大隻新鮮龍蝦添，打完邊路可以叫員工幫手拆殼，服務抵讚！我哋亦都叫咗海鮮拼盤盛，可謂包羅萬有，有生蠔、龍蝦同扇貝等，全部排列得好靚好整齊，令人賞心悅目，不過嚟唔切影剛上枱既相，朋友就已經等唔切開動左。仲有丸同餃拼盤，擺放嘅方式好特別，一層層陳架，循序漸進，各人可以因應自己唔同嘅口味揀嚟食。全部手打丸又彈牙又滑，值得一讚。當然唔少得要見呢度嘅牛小排同埋海膽杯，係佢哋嘅主打嚟㗎。牛小排擺放到好似一個半球體咁望落去好吸引！放入湯底裏面幾十秒就食得啦，牛味十足;海膽杯好精緻配上蟹籽同青瓜，一啖真係唔夠喉！蔬菜籃一定要叫，啱晒想清腸胃嘅朋友，裏面有好多唔同嘅蔬菜，番茄仔冬菇粟米同秋葵，望落成棵盆菜咁，色彩繽紛。仲有啲滷水同埋小食，等大家可以係打邊爐前開一開胃先，總體都幾推介。