見見面 (琉璃街) (已結業)

天氣涼咗凍咗，終於有啲秋冬天氣嘅感覺喇！見天氣涼浸浸，最好就係食啲辣嘢暖吓身啦！加上天氣凍冰冰，所以都唔想去得太遠，嚟到屋企附近，位於天后新開嘅一間川菜料理：見見面。手撕包菜川菜真係咩菜色都會加啲辣椒，就連蔬菜都唔少得。不過，我哋就覺得菜係特別吸辣，所以只係叫咗少辣。呢碟手撕包菜唔算太辣，少少麻，但就非常香。加上菜爽脆清甜，非常有層次。口水雞（半隻）份量十足，上面放有花生同蔥花，令口水雞嘅味道大大提升。雞件滑身。唔會太肥，辣度方面麻香較重。最正係雞肉勁掛汁，夠晒惹味。水煮牛肉除咗口水系列，水煮系列同樣係川菜嘅必然選擇。牛肉份量非常多，肉質嫩滑。索晒辣汁非常刺激。但講到最正當然係水煮牛肉入面嘅薯粉啦！四川回鍋肉講到川菜嘅經典，當然唔少得回鍋肉啦！呢碟回鍋肉唔算辣，豬肉一層肥一層瘦，邪惡得嚟又好入味。但講到每次食川式回鍋肉，最搶手一定係索咗辣汁嘅豆腐乾，好好味。四川擔擔麵 麵條幼細，湯入面仲有豬肉碎同蔥花。湯底完全唔辣，但就有濃郁嘅花生醬香味，掛湯又香濃。