Starry Night (已結業)

香港每次有餐廳推出任食生蠔，基本上我都會去試。今次嚟到呢間餐廳，真係有驚喜。其他做任食生蠔嘅餐廳，基本上啲生蠔都係好細隻，而且唔新鮮，有好多已經變咗色，相信係因為大量入貨，賣唔晒，所以先至會做任食。但係呢間餐廳睇得出係好有誠意，因為佢每一隻生蠔都係即場開，而且全部好肥美，無論顏色，香味，都睇得出係好新鮮。基本上淨係需要落檸檬汁，已經好夠味，你食得出有海水嘅味同埋生蠔嘅鮮味。每一隻都啖啖肉，脹卜卜，鍾意食生蠔嘅朋友，一定會非常喜歡。然之後我哋再嗌咗個主菜，分別係牛扒，同埋羊架。牛扒我叫咗五成熟，上枱非常嫩滑，聽老闆講係靚貨，難怪咁好食。仲有羊架都係非常好食。平時我係好怕食嘅，因為我好怕佢好大浸味，但係今次反而冇咁大陣味，食完我仲想再食添，不過個肚唔爭氣，已經飽晒啦。鍾意食生蠔嘅朋友一定要嚟呢一間餐廳，因為佢係可以任叫任食，包你食到飽！價錢唔貴，而且食物係有質素，所以大家唔使擔心。