御．八幡屋日本料理 (已結業)

今晚我們喺旺角做完嘢之後，行過兆萬中心樓下有多間放題食店嘅店員派傳單，其中一間叫「御·八幡屋日本料理」嘅店員話他們係全新裝修過，而且唔需要排好長隊等上十幾樓，所以我們就決定去呢間食晚市放題！一入到去見到店內嘅環境裝修都幾光猛，而且坐位與坐位之間都算寬敞！一開始我們當然係叫咗個雜錦刺身拼盤嚟食咗先，眾多款刺身大至上都幾爽甜新鮮，但當中嘅鯛魚就有非常重嘅泥味，呢樣係令我們比較失望！海膽手卷嘅海膽唔係好新鮮，有啲「臭壓」嘅味道！冷稻庭烏冬嘅麵質超級腍身，一啲都唔彈牙，好似食緊發漲咗好多倍嘅麵粉咁！豉汁炒蜆嘅蜆肉離晒殼，所以唔係好多蜆肉，但醬汁嘅味道就極之鹹，鹹到我們同隔離檯嘅人客都要飲咗幾杯飲品先解到啲鹹味！日式溫泉蛋就不過不失！鹽燒大虎蝦燒得嘅效果都幾好，唔會燒到燶晒，肉質相當爽甜彈牙，而且都幾大隻！黃金焗蠔嘅芝士味都幾芳香，而且唔會有好膩嘅感覺，蠔就唔算好大隻，但味道都幾鮮味！味付螺肉嘅份量非常少，但味道都還可以，而且質感都幾爽滑！