小欖燒烤樂園 (已結業)

天氣開始回暖，趁炎夏前約埋班好姊妹黎個全日燒，個個都有大有細，去自助燒烤場就最方便。今次揀左小欖燒烤樂園，早2年食過相當滿意，唔知keep唔keep到水準呢。燒烤場位於沙灘旁，佔地廣，環境優美，場內空間十足，乾淨企理，最令我驚喜係連洗手間都非常清潔。食物自助吧，有多款食物選擇，旁邊有小士多，出售飲品同小玩具。食物賣相新鮮吸引。我地加左燒烤網同夾，湊住小朋友，咁燒方便好多。蜆肉用加入調味料，用錫紙包住烤半小時，一打開已經鮮味撲鼻，全部開晒口，而且冇沙，蜆肉鮮甜多汁，絕對性比價高。食物水準唔錯，樣樣都好好食。粟米青椒等蔬菜類都好新鮮，而且處理得好乾淨。法包配上蒜蓉牛油（$2）隨便烤一烤就成為一道美食，蒜蓉牛油非常香滑，又唔會過咸，加上烤脆左既法包，結果係...我食左超過十塊，正！韓式五花腩，肥瘦適中，燒熟後油脂微焦，加上微辣既味道，味道比美韓燒店，仲要食多都唔覺膩。仲有雞翼同豬頸肉，我都非常欣賞，全部都醃得好入味，燒到外層微焦，內裡仍然充滿肉汁，非常juicy。場內有大空地，小朋友可以跑跑跳跳，大人就燒得更開心啦。環境舒適，店員非常友善，食物好似比上次黎更加美味，下次燒烤聚會，一定要再黎。