築地GINDACO (裝修中)

我真係好鍾意食章魚小丸子㗎，去親日本起碼都要食幾次， 可惜喺香港好食嘅章魚小丸子唔多，呢間築地Gindaco我覺得算係全港數一數二最好食。 我其實已經食咗呢間好多好多年啦， 真係食極都唔厭㗎 。今日我又嚟喇 ，啱啱先飲完茶， 都未落格， 又心思思去整番客章魚小丸子。 今次我叫咗玉子章魚燒，仲要係八粒裝! 太貪心 ! 等咗兩個字左右就整好， 未食已經聞到好香， 每一粒都熱辣辣㗎， 上面個蛋沙律超級好食， 蛋黃味香濃， 而主角章魚小丸子外脆內軟， 章魚粒好彈牙， 整體都係高水準!話時話，我試過喺日式超市買啲粉返屋企自己整， 但真係整唔到咁好食呀 ， 直頭係個粉都完全唔同味， 所以話呢間章魚小丸子真係好值得推介， 佢唔算平但係真係值回票價， 我諗好快我又會再嚟食啦。