長發麵家 (已結業)

我夠膽講係全港第一，請聽我從頭講起，小時候有親戚住石硤尾邨，由70年代初就開始去食，而家掌陀嘅三兄弟都做咗四十年，香港嘅麵店有兩大流派，潮州式同廣州式，潮州以魚蛋黑魚丸為主打，亦有以鹵水牛腩牛雜或清湯牛腩為賣點。但雲吞水餃就唔係佢哋專長，純粹迎合市場需要而做。廣州式主打雲吞水餃，配以柱候牛腩，南乳豬手為主。出名嘅有麥氏家族各分支，好旺角，劉森記等，有自己打麵亦有同麵廠訂，長發係廠訂嘅，卻保持質素四十年，而點解佢係天下第一，佢以廣州麵店做法，卻同時做出極品魚蛋同黑魚丸，每星期都有生劏大門鱔做魚蛋，新鮮墨魚做墨魚丸，偶有炸魚皮出現，你食到係幾生修到，自炸豬油，自制辣椒油，你去佢到幫襯過，會發現佢每一樣食品都係完美。老闆以前好寸，從來都唔接受訪問，近年有些多年捧場客說服下才開先例，香港碩果僅存嘅綠色鐵皮屋風味，批評佢嘅人，不外乎唔滿意價錢環境同服務。如果話佢唔好食，應該係年輕一輩，對香港粉麵冇認識的扮食家，我食盡香港🇭🇰粉麵店，唔絕對係香港🇭🇰最後一個古法制作食品嘅橋頭堡