生記茶餐廳 (已結業)

成日經過間依間舖頭座地招牌寫著生滾蟹粥,今晚落著雨唔想去咁遠,突然就諗起依間舖頭喇.或者因為落雨,客人唔算多,即刻就入得去.平時成日見到有人等,所以抱持十足既期待叫咗鍋生滾蟹粥同埋炸尤魚.炸尤魚先到,真係細碟得幾誇張.但係係好味既,夠咸夠脆之餘,唔會因為係炸物就用唔新鮮既尤魚.不過因為太細碟而食得好唔滿足.蟹粥好快就跟著到,即刻撈起隻蟹睇下大唔大隻,完全同預期一樣,偏細,蟹肉唔多,但係夠新鮮,而且蟹膏甘香.粥聞落幾香,睇嚟煲得出蟹味喎.不顧滾熱辣咁呷一啖,係好味既,但唔係蟹粥味囉.粥底好綿,係我最中意既質感,味道都鮮,但真係唔係蟹味囉.無話係味精,或者真係用咗好多材料整粥底,但蟹既味道都出唔到嚟.或者蟹既問題,或者因為生滾粥好難咁短時間好難出味,但未聽過老火蟹粥喎.