囍點 (已結業)

剛踏進四月，雨仍落過不停，好奄悶！知道囍點新推私房菜，兩公婆就訂位一試！七點零上到去，原來兩位都會間個小屏風，自成一角慢慢嘆！通常掛住食唔記得食咗D乜，好在有菜單。蜜椒煙鴨胸：甜中帶點黑椒香，正！芥末雲耳：吃了一口，很嗆！交俾老婆。黑醋茄子：微酸，醒胃。原盅杏汁燉豬肺湯：對於杏仁味十分抗拒的我，此湯味道剛好，老婆就話濃D仲正！鮑羅萬有：山根釀入所有材料，略嫌螺肉太硬，轉鮑魚就正啦！群龍聚首：黃金煎及沙律汁燴，甘香味濃，無得輸！涼瓜菜甫肉鬆煎封海英䱽：估唔到個汁同條魚咁夾，互相交纏，好複雜！鮮蟹肉南瓜蓉蒸蛋白：每層味覺，口感，都有驚喜！至此，老婆已經飽到投降。翡翠田園：小唐菜加杏鮑菇，正好清一清味蕾。馬拉盞排骨蒸籠仔飯：雖然好飽，但一打開個蒸籠，果陣荷香，馬拉盞香，排骨香，飯香，撲鼻而來，唔食對唔住自己，餘下打包（真惜食）。精美甜品：當然整碗薑汁湯圓驅寒啦，真係好辣！雞蛋迷你馬拉糕：鬆軟彈滑，完美結局。食飽埋單，不經不覺食咗兩粒鐘，下次試埋另一款先。兩公婆趁無落雨帶埋個飯盒散下步。