兩草 (已結業)

今日識得嚟呢間小店試食，全靠open rice嘅指引，最近多咗食評講呢間小店。其實佢個名“兩草”都改得幾特别，最初以為係兩個男孩子經營。幫襯完先知原來大部份小食的價錢係廿蚊，即俗語“兩草”，有意思！雖然搬咗新舖，座位仍然好擠逼，唔會令人坐得舒適。屬於食完要即走的經營模式。店内所售的食物款式不多，小食及飲品一般的售價约廿蚊。今次我揀咗香煎魚餅$20、咖央多士$20及羅漢果水$20。本身我好鍾意食煎魚餅，貪佢香口得嚟又唔油膩。呢度將魚肉煎到金黃色，外脆内軟，又唔會過火，恰到好處。再加上翠綠的葱花，增添清新的口感，令食味提升。值得一試！咖央多士烤得夠薄脆，但相對無乜咬口，對喜歡厚多士的朋友可能覺得不是味兒。咖央醬的食味與其他食店有出入，只有濃烈的椰絲味，但又唔算太甜，整體唔算吸引。一試無妨！自家製的羅漢果水有驚喜，羅漢果味出眾，味道濃烈，真材實料，沒有溝水開稀的成份。非常適合宜家嘅天氣，清心解暑。值得一試！食咗咁多野，賣單正是兩草、兩草又兩草。今時今日經營成本上脹，工資丶舖租及食材價格都不斷上調，所以一眾愛吃和懂吃的老饕要好好支持這些小店經營呢！