潮．悅 (始創中心)

營業中

休息中

公司飯局訂咗太子始創中心嘅潮.悅，酒樓位於4樓，但喺後面部上有啲難搵，酒樓裝修好新，天花幾支水晶燈好光猛。先來乳豬全體，而家新式乳豬全體係無骨，唔會好肥豬皮夠脆，一人兩件，唔錯。上湯龍蝦伊麵，都算大碟伊麵幾多，龍蝦大件，啱啱一人一件，龍蝦新鮮走油彈牙。碧綠花枝蚌片大大碟，食極都有。脆炸鳳尾蝦多士，酒樓都有得食，熱辣辣即炸，多士香脆，上面蝦滑包住鮮蝦，灑上芝麻夠Q彈。燉雞湯，成盅用料十足，湯濃好飲。清蒸龍躉就有點失色，一來過晒火，二來條魚有啲味，唔好食。脆皮燒雞係冰鮮雞，都炸得唔錯，最緊要皮夠脆，有雞油香唔會梅。仲有個什菌浸豆苗有啲油，不過食落好香好滑，豆苗夠嫩。