成記茶寮

營業中

休息中

一早特登入元朗食冬菇亭，食咗其中一間出名食豬扒嘅成記茶寮，之前食過一兩次，覺得抵食得嚟味道又唔錯，之後幾年冇嚟過，今次都冇令我失望，雖然相信都加咗少少價，但係質素冇咩變化，仲見佢似乎做咗少少裝修，雖然都係喺公廁隔離，但整體環境感覺比以前好，叫咗個豬扒雞球飯，加杯凍奶茶，個飯好大碟，一個女仔一定食唔晒，個豬扒依然大大件，煎香左加埋少少肥膏，好香口，味道唔錯，幾腍但係仲保持都有咬口，個雞球又係大大件，雞球同啲飯嘅味道就係靠個豉油，豉油嘅調味調得好，送飯一流，所以個重點就係豬扒同豉油，至於杯凍奶茶，就真係爭啲啲，茶味唔夠濃，糖水亦都過甜，如果唔係太熱，淨係叫個飯已經足夠，埋單$55，尚算合理。