嘉蘭娜餐廳 (已結業)

嘩，咁多人彈呢間餐廳，真係嚇我一跳！不嬲都幾鍾意Galano 菜式，所以想在此為佢平反一下。呢間餐廳一向都會將當日精選寫個有轆鏡上面，由侍應推埋客人前作介紹。如果冇興趣聽，可以同侍應講聲，咁佢應該唔會繼續騷擾你。正如大部份比較高級西餐廳，呢度基本上冇供應免費水，不過如果客人需要熱水，亦唔會託手或收費。講番食物，呢度海鮮意大利飯真係非常美味，有鮮味但唔會腥，而且飯粒質地恰到好處。不過頭盤類則只屬普通，白酒煮蜆可以一試，生牛肉沙律就唔係幾得。此外，呢度素薄餅係我最鍾意，餅底香脆，餡料亦好鮮味，我通常會請廚師幫我加少少黑橄欖，惹味好多！值得一提係呢度紅酒(House Red),相當好味而且價錢合理─約二百幾一樽，係97年份意大利酒，算抵飲，Citysuper 都賣175元一樽。至於甜品方面，我幾喜歡佢Creme Bruelee ﹝焦糖布甸﹞同朱古力軟心蛋糕，後者略甜，不嗜甜者可以免了。整體來說，呢度環境好好，食物亦有水準，價錢屬中級，開埋酒每位晚餐都只係二百幾元，算抵食。至於各位食家對該處服務投訴，我雖然冇遇過，但有機會都會向佢地反映一。