德利潮州菜館

營業中

休息中

耐唔耐就會想食蠔餅，隨便睇吓外賣平台外賣自取有邊間潮州菜喺附近。呢間德利之前係未食過嘅，好自然又上嚟OpenRice睇吓啲食評啦，評語好似麻麻哋咁，不過我費事再搵啦，咁又照試吓啦。點左一個蠔餅再加胡椒豬肚湯，大約15分鐘就有得攞。我早咗少少去，期間見到都唔少人攞外賣。職員見到我好有禮貌咁問我叫咗啲乜嘢，要稍等一陣間，之後啲嘢食有得攞，佢哋都好有禮貌喎。返到屋企先至發現原來每個小菜係跟一個白飯嘅，所以我呢個order有兩大碗白飯，我食唔晒，下次要記得叫佢走白飯 😅。兩個餸都幾好食，一般潮州菜應有嘅水準，份量亦都好足，蠔餅啖啖都有蠔肉，至於胡椒豬肚湯亦好足料，唔止有豬肚仲有粉腸，味道都ok, 係略略鹹咗少少🤏外賣平台自取有八折，折咗之後$122，其實好抵食，因為其他潮州菜館淨係個蠔餅都要$80-$90，佢仲要送個飯喎…都應該可以話大件夾抵食。