麒藝館 (已結業)

又到每月兩次嘅facial日、新界牛難得過海出城嘅日子啦！銅鑼灣一向屬高消費地段，特別時代廣場高層食肆，至少一餐人均$500，見於近期無幾可出門，決定食貴少少獎勵吓自己順便支持本土經濟麒藝館主打花膠嘅中菜，就喺出名片皮鴨嘅鴨大哥旁。大門放置咗盤風水松柏，有和諧長青之意，如餐廳環境一樣寧靜祥和。入座首要當然係開茶，是日心水係香片。其一喜愛佢嘅清香，其次係見餐牌上寫有美容養顏清腸之效，正好配合返本日養顏養身嘅主題。一向只識花膠按重量大小定價，原來品質亦有考究，以質量味道口感區分品質。以花膠入饌嘅凝膠凍，晶凝通透，從外就能見到內層滿滿嘅花膠，口感如桂花糕般爽滑彈牙。單吃能品嘗到花膠原有嘅鮮味，鮮美獨特而又不腥。旁邊有同樣製成絲狀凝膠嘅喼汁，便於調節份量，酸而不濃嘅調味增令鮮甜進一步提升。牛肋骨擺碟精美，起得乾淨俐落嘅主骨放於一邊，充滿原汁原味醬汁濃厚鮮甜，略帶微酸，惹味不膩；肉質鬆軟入味，依附於肉間嘅脂肪軟嫩黏滑，配上爽口嘅牛肝菌，簡單嘅食材帶出豐富滋味。