嘉華茶餐廳 (已結業)

今日師傅見唔係好大雨, 於是就決定行遠d, 搵下野食, 本來想去檀島食個午餐, 點知去到見到勁多人, 加上見到個午餐唔係咁啱食, 決定行遠少少; 去到呢間食店門口, 師傅見到個午餐幾吸引, 於是就決定入黎醫肚!入到去地方都幾細, 伙計都有禮安排入座, 坐底後即刻睇下有咩食, 不過最後都係柯打左個精選午餐, 揀左三號仔洋蔥豬扒火腿飯同埋凍檸茶!望穿秋水終於等到碟洋蔥豬扒火腿飯, 賣相都一般, 份量都係一般啦; 先試下個汁, 幾香不過幾杰, 味道可以; 而火腿得一塊, 冇咩特別; 豬扒又係得一塊, 唔算好大塊, 肉身幾鬆, 不過就幾乾身, 都係普通啦; 而杯凍檸茶就幾大杯, 不過茶底幾澀, 飲唔到有檸檬味同甜味, 都係一般啦!總括黎講食物質素普通, 服務一般, 地方就幾細, 價錢都算公價, 三十蚊個午餐, 凍飲加兩蚊, 抵唔抵食就見仁見智; 師傅覺得如果偶然黎呢度食一餐, 都可以接受, 不過應該冇下次, 因為冇咩野吸引到師傅喇!