赤橋拉麵 (已結業)

係井財街附近翻工，中午見到有拉麵店諗都唔諗就入左去食。相信呢間係本店，另一間係屯門既分店，因為佢叫赤橋拉麵，開係元朗紅橋附近😂。店面唔大始終係小店，但唔算太逼，都坐得ok舒服既。拉麵一到第一件事就係飲湯，海老湯底飲得出蝦味，亦都唔會蓋過豬骨味。湯唔會好咸，但係都夠濃郁，重點係飲哂成碗都唔口渴！證明一啲味精都冇！少少不足既地方係，個湯可以再熱啲。溏心蛋係偏熟少少既蛋黃，溏心效果都可以，味道適中，個人好怕浸到隻蛋太咸，冇左蛋原本既香味，所以整體來說係唔錯。叉燒應該係肩肉，腍得黎有啲咬口，亦唔會太韌或者嚡熠熠。個人比較鍾意肩肉瘦叉多過腩肉肥叉，所以真心唔錯。味筍既粗幼度比起出面切得比較幼，少少甜味，幾爽口，唔會有某啲地方食竹筍既臭味。麵係太麵，煮得軟硬適中，爽口彈牙，亦都掛到湯。仔細睇會見到有啲細既麥碎粒係麵條入面，唔係一般既麵。份量都幾好，唔會太飽，亦都唔係食空氣，唔需要加麵都得。如果大食既可以加餃子或者雞肉串。整體來講係一間高質抵食既拉麵小店，雖然香港地道但有正宗味道，一啲都唔媽虎。味道 1.7/2.0環境 1.5/2.0服務 1.6/2.0衛生 1.6/2.0價錢 1.5/2.0總分