老掌櫃東北菜館 (已搬遷) 新店位置

見到網上評價咁高，特登預早兩日定位，諗住可以食到正宗東北菜嘅口味，點知只係屬於普普通通嘅貨色，唔係大家講得咁好囉。或者係我叫唔中佢哋拿手嘅小菜？頭盤叫咗醉雞，其實味道都OK嘅，但係略嫌雞肉唔係太入味，同埋有少少生得滯，整體雞肉尚算爽口，中上水準。跟住之後就叫咗一碟松鼠魚，一上枱，都覺得怪怪地，因為顏色實在太過鮮艷，感覺好假。食落口，真係非常非常酸，白醋落得太多，有少少赤親喉嚨嘅感覺，同埋碟餸放入好多急凍雜豆，奇奇怪怪咁，同成件事完全唔搭。失望呀！跟住就到呢個所謂嘅排骨擔擔麵。其實佢擔擔面係做得唔錯嘅，口味尚算正宗，不過就清淡左少少，我希望佢濃味啲，都OK嘅。但係最激氣就係嗰啲排骨，炸得超級差，又淋又滴油，一睇就知油溫未夠就放落去炸，食咗一舊就再冇興趣食第二舊入口。或者係咪我抱太大期望呢？一話呢度真係唔夾我嘅口味呢？我覺得呢度非常普通，或者我應該俾多次機會佢？我唔知，因為我覺得太多餐廳，比佢做得更好食、做得更出色了。